पुणे : पुणे ही राज्याची सांस्कृतिक राजधानी, तर कोथरुड हे या सांस्कृतिक राजधानीचे माहेरघर. कोथरुडमधील अनेक कलावंतांनी आपल्या समृद्ध कलाविष्काराने आणि प्रतिभेने संपूर्ण महाराष्ट्राला आपलेसे केले आहे. त्यामुळे नवोदित कलाकारांना कोथरुड मध्ये आपली कला सादर करण्याची सदैव इच्छा असते. त्यासाठी गतवर्षी स्वातंत्र्याच्या अमृतमहोत्सवानिमित्त नृत्यवंदना हा शास्त्रीय नृत्यावर आधारित कार्यक्रमाचे आयोजन केले होते. उच्च व तंत्र शिक्षण मंत्री चंद्रकांत दादा पाटील आयोजित गुरु पंडिता रोहिणी भाटे नृत्य महोत्सव या कार्यक्रमास कोथरुडकरांनीही उत्स्फूर्त प्रतिसाद दिला.
चंद्रकांत पाटील यांनी शास्त्रीय नृत्य कलाकारांना हक्काचे व्यासपीठ उपलब्ध करून देण्यासाठी दरवर्षी नृत्यमहोत्सव आयोजित करण्याचे जाहीर केले होते. त्यानुसार पुणे शहराचे भूषण असलेल्या, कथक नृत्य गुरू पंडिता रोहिणी भाटे ह्यांच्या स्मृतिप्रित्यर्थ नृत्य महोत्सव आयोजित करण्यात आला. देशभरातील अनेक कलाकारांनी आपापले कलाविष्कार सादर करत कोथरुडकरांची मने जिंकली.
जगविख्यात कलाकारांमध्ये गुरू श्रीमती. रमा वैद्यनाथन आणि ग्रुप (भरतनाट्यम), गुरू श्रीमती. वास्वती मिश्रा(कथक) आणि ग्रुप तसेच गुरू श्रीमती प्रीती पटेल आणि ग्रुप (मणिपुरी) ह्या नृत्यप्रस्तुती सादर करुन कलारसिक कोथरुडकरांना मंत्रमुग्ध केले.
चंद्रकांत पाटील यांनी या कार्यक्रमाचे संयोजक तथा भाजपा पुणे शहर सरचिटणीस पुनीत जोशी, शास्त्रीय नृत्य संवर्धन संस्था आणि युवा सुराज्य प्रतिष्ठानच्या सर्व कार्यकर्त्यांचं मनापासून अभिनंदन केले.