सन 2023-24 अन्वये उपलब्ध करून दिलेल्या निधीतून प्रत्येक विभागाने केलेल्या चांगल्या दहा कामांची यादी तयार करून ठेवावी – पालकमंत्री चंद्रकांत पाटील
![](https://firstmaharashtra.com/wp-content/uploads/2024/06/palakmatri-baithak-750x430.jpg)
सोलापूर : सोलापूर निवेदन समितीच्या सभागृहात सर्व विभागप्रमुखांच्या बैठकीचे आयोजन करण्यात आले होते. यावेळी पालकमंत्री चंद्रकांत पाटील यांची प्रमुख उपस्थिती होती. पाणीटंचाई आणि इतर नागरी समस्यांबाबत बैठकीत चर्चा झाली.जिल्हा वार्षिक योजना सन 2023-24 अन्वये उपलब्ध करून दिलेल्या निधीतून प्रत्येक विभागाने केलेल्या चांगल्या दहा कामांची यादी तयार करून ठेवावी. या सर्व कामांना आपण प्रत्यक्ष भेट देऊन मंजुरीप्रमाणे कामे पूर्ण झाली आहेत का पाहून कामांचा दर्जाही तपासू, असे या वेळी पाटील यांनी स्पष्ट केले.
चंद्रकांत पाटील यांनी जिल्ह्यातील सर्व नागरिकांनी उपलब्ध पाणी जपून वापरावे, असे आवाहन केले. यावेळी 74 कोटी 35 लाख 38 हजारांच्या टंचाई कृती आराखड्यास मान्यताही देण्यात आली. सोलापूर महापालिकेने दुहेरी पाइपलाइनचे उर्वरित 20 टक्के काम नोव्हेंबर 2024 अखेर पूर्ण करून सोलापूर शहराला नियमित पाणीपुरवठा करण्यासाठी प्रयत्न करावेत. पाणी वितरण व्यवस्था तसेच नगर उत्थान अंतर्गत घेण्यात आलेल्या कामांसाठी आवश्यक निधी उपलब्ध करून देण्यात येईल, असे सांगून सोलापूर महापालिका व वीज वितरण कंपनीने परस्परांत योग्य समन्वय ठेवून पाणीपुरवठ्यासाठी आवश्यक वीजपुरवठा सुरळीत राहील, याची दक्षता घेण्याच्या सूचना पाटील यांनी दिल्या.