चंद्रकांत पाटील यांनी आज उपमुख्यमंत्री अजितदादा पवार यांची भेट घेऊन कोथरुड विधानसभा मतदारसंघातील मिसिंग लिंकसाठी आवश्यक निधी देण्यासंदर्भात दिले निवेदन
पुणे : कोथरुड विधानसभा मतदारसंघातील वाढती वाहतूक कोंडी आणि रस्त्यांच्या समस्येवर त्वरित उपाययोजना करण्यासाठी उच्च व तंत्र शिक्षण मंत्री तथा कोथरूड मतदारसंघाचे आमदार चंद्रकांत पाटील यांनी आज मंत्रालयात उपमुख्यमंत्री तथा पुणे जिल्ह्याचे पालकमंत्री अजितदादा पवार यांची भेट घेऊन मिसिंग लिंकसाठी आवश्यक निधी देण्यासंदर्भात निवेदन दिले.
पुणे शहरातील रस्ते विकासामध्ये येणाऱ्या अडथळ्यांविषयी अजित पवार यांच्यासोबत चर्चा केली असल्याची माहिती पाटील यांनी दिली. पुण्यातील वाहतूक कोंडी सोडवण्यासाठी निधीची आवश्यकता आहे. महापालिकेच्या माध्यमातून शहरातील ३३ प्रमुख रस्त्यांपैकी १५ प्रमुख रस्त्यांच्या विकासासाठी ‘मिशन १५’ हाती घेण्यात आले आहे. या प्रकल्पासाठी एकूण ८७० कोटी रुपये खर्च अपेक्षित असून, कोथरुड मतदारसंघातील रस्ते विकासासाठी ३२५ कोटींची आवश्यकता आहे. यापैकी १५० कोटींचा निधी राज्य सरकारकडून अपेक्षित असल्याचे पाटील यांनी सांगितले.
उपमुख्यमंत्री अजितदादा पवार यांनी सकारात्मक प्रतिसाद देताना पुणे शहरातील रस्ते विकासासाठी आवश्यक तो निधी राज्य सरकारकडून दिला जाईल, अशी ग्वाही यावेळी दिली.