पुणे : संतश्रेष्ठ ज्ञानेश्वर महाराजांच्या ७५०व्या जन्मोत्सव सोहळ्यानिमित्त आयोजित हरिनाम सप्ताहाच्या सातव्या दिवशी आळंदी देवस्थान आणि आळंदीकर ग्रामस्थ यांच्या संयुक्त विद्यमाने माऊलींचा रथोत्सव आयोजित करण्यात आला होता. यानिमित्त आळंदीची नगर प्रदक्षिणा करून इंद्रायणीकाठी तब्बल साडेसात हजार महिलांच्या उपस्थितीत दीपोत्सव साजरा करण्यात आला. यावेळी केंद्रीय मंत्री मुरलीधर मोहोळ आणि उपमुख्यमंत्री एकनाथ शिंदे यांनी उपस्थित राहून माऊलींना वंदन केले. गेल्या आठवडाभर सुरू असलेल्या ग्रंथराज ज्ञानेश्वरी पारायण सोहळ्याचा समारोपही यावेळी करण्यात आला.
यावेळी मुरलीधर मोहोळ म्हणाले की, मोदी सरकार आणि महायुती सरकारच्या माध्यमातून इंद्रायणी नदी शुद्धीकरण प्रकल्प हाती घेण्यात आला असून लवकरच कामाचा प्रारंभ होणार आहे. इंद्रायणीचं ऐतिहासिक महत्त्व आणि वारकरी संप्रदायाची इंद्रायणीबद्दल असणारी आस्था शब्दात वर्णन करण्यापलिकडची आहे. म्हणूनच सदरील प्रकल्प प्राध्यानाने हाती घेण्यात आला असल्याची माहिती मोहोळ यांनी दिली.
यावेळी एकनाथ शिंदे म्हणाले, आज इथे बसलेल्या प्रत्येक वारकऱ्याच्या मनात एकच इच्छा आहे आणि ती म्हणजे इंद्रायणी नदी स्वच्छ आणि प्रदूषणमुक्त व्हावी. राज्य शासनाने देखील हे काम मनावर घेतले असून इथे एसटीपी उभारून त्या माध्यमातून हे काम पूर्ण करण्यात येईल. केंद्र आणि राज्य शासनासोबतच वारकऱ्यांची देखील याकामी मदत लागणार असून ती देखील आपण कराल याची मला पूर्ण खात्री असल्याचे त्यांनी सांगितले. तसेच मंदिर समितीच्या ४५० एकर जागेत ‘ज्ञानभूमी’ची उभारणी करण्याचा त्यांचा मानस आहे. या परिसराचा टप्प्याटप्याने विकास करण्यासाठी सरकार पूर्ण सहकार्य करेल. तसेच मंदिर परिसरात भक्त निवास उभारण्यासाठी नगरविकास विभागाच्या माध्यमातून २५ कोटी रुपये देण्याची घोषणा यावेळी एकनाथ शिंदे यांनी केली.
यावेळी विधान परिषदेच्या उपसभापती डॉ. नीलमताई गोऱ्हे, खासदार श्रीरंगआप्पा बारणे, आमदार विजयबापू शिवतारे, आमदार उत्तमराव जानकर यांच्यासह आळंदी संस्थानचे प्रमुख विश्वस्त श्री. योगी निरंजननाथ, विश्वस्त हभप चैतन्यमहाराज लोंढे, विश्वस्त डॉ. भावार्थ देखणे, विश्वस्त ॲड. राजेंद्र उमाप, विश्वस्त ॲड. रोहिणताई पवार, विश्वस्त हभप पुरुषोत्तममहाराज पाटील यांच्यासह संस्थानचे पदाधिकारी, आळंदीचे ग्रामस्थ आणि वारकरी मोठ्या संख्येने उपस्थित होते.