उच्च व तंत्र शिक्षण मंत्री चंद्रकांत पाटील यांच्या हस्ते पुण्यातील दत्तवाडी येथील रुद्रांश ढोल ताशा पथकाच्या वाद्यांची पूजा संपन्न

पुणे : राज्य सरकारने गणेशोत्सवाला राज्योत्सवाचा दर्जा दिला आहे. तसेच पारंपरिक वाद्यसंस्कृतीला प्रोत्साहन देण्यासाठी ढोल पथकांवर गुन्हे दाखल होणार नाहीत, असा ऐतिहासिक निर्णय मुख्यमंत्री देवेंद्र फडणवीस यांच्या नेतृत्वाखाली घेण्यात आला आहे. या निर्णयाची माहिती उच्च व तंत्र शिक्षण मंत्री चंद्रकांत पाटील यांनी दत्तवाडी येथे ढोल पथकाच्या वाद्यांची पूजा या विशेष कार्यक्रमात दिली. चंद्रकांत पाटील यांच्या हस्ते शुक्रवारी रुद्रांश ढोल ताशा पथकाच्या वाद्यांची पूजा करण्यात आली. यावेळी पाटील यांनी उपस्थित सर्वांना शुभेच्छा दिल्या.

यावेळी ढोल ताशा महासंघाचे पराग ठाकूर, पुनीत जोशी, रुद्रांश ढोल पथकाचे अमर भालेराव, अभिजीत गाडे, अमोल शुक्ला यांच्यासह वादक मोठ्या संख्येने उपस्थित होते.

लोकमान्य टिळकांनी सुरू केलेल्या सार्वजनिक गणेशोत्सवाला आता ‘राज्य उत्सव’ म्हणून अधिकृत मान्यता मिळाली आहे. गणेशोत्सवावरील सर्व निर्बंध आता रद्द करण्यात येत असून, उत्सवासाठी ५०० कोटी रुपयांचा निधी मंजूर करण्यात आला आहे. गणेशोत्सव आता केवळ धार्मिक वा सामाजिक कार्यक्रम न राहता, राज्यस्तरीय महत्त्वाचा सांस्कृतिक कार्यक्रम म्हणून साजरा केला जाणार आहे. यासोबतच कोणत्याही ढोल-ताशा वाजवणाऱ्या पथकावर खटले दाखल केले जाणार नाहीत, असा मोठा निर्णय पुणे पोलिसांनी यंदाच्या वर्षी घेतला आहे. या पारंपरिक वाद्यसंस्कृतीला प्रोत्साहन देण्यासाठी पुणे पोलिसांनी सकारात्मक भूमिका घेतली आहे.