महाराष्ट्र लोकसेवा हक्क अधिनियमांतर्गत विद्यापीठाशी संबंधित सेवा ‘आपले सरकार’ पोर्टलवर ऑनलाइन उपलब्ध करण्याबाबत उच्च व तंत्र शिक्षण मंत्री चंद्रकांत पाटील यांच्या अध्यक्षतेखाली बैठक संपन्न
मुंबई : मंत्रालय येथे आज महाराष्ट्र लोकसेवा हक्क अधिनियमांतर्गत विद्यापीठाशी संबंधित सेवा ‘आपले सरकार’ पोर्टलवर ऑनलाइन उपलब्ध करण्याबाबत उच्च व तंत्र शिक्षण मंत्री चंद्रकांत पाटील यांच्या अध्यक्षतेखाली बैठक संपन्न झाली. विद्यापीठाशी संबंधित ऑनलाइन सेवांबाबतचे सादरीकरण श्री. अनुप बाणाईत यांनी बैठकीदरम्यान केले.
चंद्रकांत पाटील यांनी माहिती दिली कि, उच्च व तंत्र शिक्षण विभागाच्या वतीने विद्यापीठाशी संबंधित ५६ अधिसूचित सेवा आता ‘आपले सरकार’ पोर्टलवर ऑनलाइन सुरू करण्यात आल्या असून, त्यापैकी २० सेवा थेट विद्यापीठाशी संबंधित आहेत. या माध्यमातून राज्यातील जवळपास २० लाख विद्यार्थ्यांना लाभ होणार आहे. विद्यार्थ्यांना या सेवा विहित मुदतीत मिळाव्यात यासाठी विद्यापीठांनी डॅशबोर्डवर आलेल्या अर्जांची काटेकोरपणे पडताळणी करून कार्यवाही करावी, असे निर्देश यावेळी देण्यात आले.
या बैठकीस उच्च व तंत्र शिक्षण विभागाचे अपर मुख्य सचिव बी. वेणुगोपाल रेड्डी, उच्च शिक्षण संचालक डॉ. शैलेंद्र देवळाणकर, तंत्रशिक्षण संचालक डॉ. विनोद मोहितकर, उपसचिव अशोक मांडे, सहसचिव संतोष खोरगडे तसेच राज्यातील विविध विद्यापीठांचे कुलगुरू व अधिकारी दूरदृष्यप्रणालीद्वारे उपस्थित होते.