मंत्री चंद्रकांत पाटील यांनी नगर परिषद निवडणुकीच्या प्रचारार्थ भाजपा ताराराणी आघाडीतील प्रथितयश व्यक्ती तसेच जयसिंगपूर विकास आघाडीच्या वडार समाजातील बांधवांशी साधला संवाद
कोल्हापूर : शिरोळ नगर परिषद निवडणुकीत भाजपा ताराराणी आघाडीच्या प्रचारार्थ आज उच्च व तंत्र शिक्षण मंत्री चंद्रकांत पाटील यांनी शिरोळमधील प्रथितयश व्यक्तींच्या घरी सदिच्छा भेटी दिल्या. यासोबतच जयसिंगपूर नगर परिषद निवडणुकीत भारतीय जनता पक्ष पुरस्कृत जयसिंगपूर विकास आघाडीच्या प्रचारार्थ वडार समाजातील बांधवांशी देखील पाटील यांनी संवाद साधला.
या भेटीत मिळालेल्या आत्मीय स्नेहाबद्दल आणि आदरातिथ्याबद्दल पाटील यांनी मनापासून आभार व्यक्त केले. शिरोळमध्ये मिळालेला उत्स्फूर्त प्रतिसाद पाहता भाजपा महायुती ताराराणी आघाडी प्रचंड बहुमताने विजयी होणार याचा ठाम विश्वास वाटत असल्याचे पाटील यांनी म्हटले.
वडार समाजातील बांधवांशी संवाद साधताना पाटील म्हणाले, विकसित आणि प्रगत जयसिंगपूरसाठी प्रत्येक घटकाचे मत आणि समर्थन महत्त्वाचे आहे. मोदीजी आणि देवेंद्रजींच्या नेतृत्वाला बळकट करत, जयसिंगपूरच्या सर्वांगीण विकासासाठी भाजपाच्या उमेदवारांना विजयी करण्याचे आवाहन या वेळी त्यांनी केले.
या प्रसंगी जिल्हाध्यक्ष राजवर्धन नाईक-निंबाळकर, माधवराव घाडगे, हातकणंगलेचे आमदार डॉ. अशोकराव माने, डॉ. निता माने, नगराध्यक्ष पदाच्या उमेदवार सारिका माने, प्रमोद लडगे, सुहास राजमाने, शिवाजीराव गावडे, शिवाजीराव सांगले, दादा कोळी, संभाजी भोसले यांच्यासह सर्व उमेदवार आणि पदाधिकारी उपस्थित होते.