नगर पंचायत निवडणुकीत भाजपा महायुतीचाच झेंडा नगरपरिषद भवनावर फडकणार, असा ठाम विश्वास – मंत्री चंद्रकांत पाटील
कोल्हापूर : हातकणंगले नगर पंचायत निवडणूक प्रचारार्थ उच्च व तंत्र शिक्षण मंत्री तथा भाजपचे ज्येष्ठ नेते चंद्रकांत पाटील यांच्या प्रमुख उपस्थितीत भव्य रोड शो आणि विजयी सभा पार पडली. या कार्यक्रमास उपस्थित राहून पाटील यांनी हातकणंगलेकरांचा मिळालेला उत्स्फूर्त प्रतिसाद अनुभवला.
या रोड शोदरम्यान मिळालेला जबरदस्त उत्साह आणि विजयी सभेला उमटलेला प्रतिसाद पाहता, हातकणंगलेकरांचा आशिर्वाद भाजपा महायुतीसोबत आहे, याबाबत पूर्ण विश्वास वाटतो, असे मत पाटील यांनी व्यक्त केले. येणाऱ्या नगर पंचायत निवडणुकीत भाजपा महायुतीचाच झेंडा नगरपरिषद भवनावर फडकणार, असा ठाम विश्वास देखील पाटील यांनी यावेळी व्यक्त केला.
या प्रसंगी खासदार धनंजय महाडिक, माजी आमदार तथा भाजपाचे प्रदेश उपाध्यक्ष सुरेश हळवणकर, ज्येष्ठ जि.प. सदस्य अरुणराव इंगवले, नगराध्यक्ष पदाचे उमेदवार राजू इंगवले, प्रसाद खोबरे, अजिंक्य इंगवले, शितल आवळे यांच्यासह सर्व उमेदवार आणि नागरिक मोठ्या संख्येने उपस्थित होते.