भारताच्या अवकाश भरारीचा नवा विक्रम! इस्रोकडून सर्वात जड उपग्रह ‘ब्लूबर्ड ब्लॉक-२’ चे यशस्वी प्रक्षेपण; मंत्री चंद्रकांत पाटील यांच्याकडून शास्त्रज्ञांचे अभिनंदन

श्रीहरिकोटा: भारतीय अंतराळ संशोधन संस्थेने (ISRO) आज अवकाश क्षेत्रात एक नवा इतिहास रचला आहे. LVM3-M6 या महत्त्वाकांक्षी मोहिमेद्वारे भारताच्या भूमीतून आतापर्यंतचा सर्वात जड उपग्रह ‘ब्लूबर्ड ब्लॉक-२’ (BlueBird Block-2) अचूक कक्षेत यशस्वीपणे प्रस्थापित करण्यात इस्रोला यश आले आहे. या गौरवशाली कामगिरीबद्दल राज्याचे उच्च व तंत्र शिक्षण मंत्री चंद्रकांत पाटील यांनी इस्रोचे शास्त्रज्ञ आणि अभियंत्यांचे मनःपूर्वक अभिनंदन केले आहे.

या मोहिमेच्या यशावर प्रतिक्रिया देताना मंत्री चंद्रकांत पाटील म्हणाले की, “पंतप्रधान नरेंद्र मोदी यांच्या दूरदृष्टीपूर्ण आणि सक्षम नेतृत्वाखाली भारत अवकाश तंत्रज्ञानात आत्मनिर्भरतेचा नवा अध्याय लिहीत आहे. जागतिक व्यावसायिक प्रक्षेपण क्षेत्रात भारत आता एक विश्वासार्ह आणि प्रभावी शक्ती म्हणून वेगाने उदयास येत आहे. हे यश केवळ इस्रोचे नसून संपूर्ण देशाचे आहे.”

पाटील यांनी या मोहिमेत महाराष्ट्राच्या योगदानाचा विशेष उल्लेख केला. ते म्हणाले, “या गौरवशाली यशात महाराष्ट्रातील अनेक संस्था आणि उद्योगांचे योगदान लाभले आहे, याचा आम्हाला सार्थ अभिमान वाटतो. ही कामगिरी प्रत्येक भारतीयाची मान अभिमानाने उंचावणारी आहे.”

ब्लूबर्ड ब्लॉक-२ हा इस्रोने प्रक्षेपित केलेला आतापर्यंतचा सर्वात वजनदार उपग्रह आहे, ज्यामुळे इस्रोच्या प्रक्षेपकाची (LVM3) क्षमता पुन्हा एकदा सिद्ध झाली आहे. या मोहिमेमुळे जागतिक सॅटेलाइट लॉन्च मार्केटमध्ये भारताचे स्थान अधिक भक्कम झाले आहे. शास्त्रज्ञांच्या अचूक नियोजनामुळे उपग्रहाने ठरवलेली कक्षा गाठली असून, यामुळे दळणवळण क्षेत्रात मोठी क्रांती अपेक्षित आहे. या यशानंतर देशभरातून इस्रोवर कौतुकाचा वर्षाव होत असून, भारताने अंतराळ संशोधनात जागतिक स्तरावर आपला दबदबा पुन्हा एकदा निर्माण केला आहे.