कोथरूडमध्ये शरद पवार गटाला खिंडार; युवक अध्यक्ष प्रमोद शिंदे यांचा मंत्री चंद्रकांत पाटील यांच्या प्रमुख उपस्थितीत भाजपमध्ये जाहीर प्रवेश
पुणे : पुणे महानगरपालिका निवडणुकीच्या मतदानासाठी अवघा आठवडा शिल्लक असताना कोथरूडमध्ये राष्ट्रवादी काँग्रेस (शरदचंद्र पवार) पक्षाला मोठा हादरा बसला आहे. कोथरूड विधानसभा मतदारसंघाचे राष्ट्रवादी युवक अध्यक्ष प्रमोद शिंदे यांनी आज शेकडो कार्यकर्त्यांसह भारतीय जनता पक्षात अधिकृत प्रवेश केला.
राज्याचे उच्च व तंत्रशिक्षण मंत्री चंद्रकांत पाटील यांनी प्रमोद शिंदे यांचे भाजपमध्ये स्वागत केले. यावेळी त्यांनी शिंदे यांच्या पुढील राजकीय वाटचालीस शुभेच्छा दिल्या.
या पक्षप्रवेश सोहळ्याला भाजपचे ज्येष्ठ नेते सुशील मेंगडे, राजाभाऊ बराटे, महेश पवळे, संतोष बराटे यांसह अनेक पदाधिकारी उपस्थित होते.
१५ जानेवारीला होणाऱ्या मतदानापूर्वी कोथरूडमधील शरद पवार गटाचे मुख्य युवा नेतृत्व भाजपमध्ये आल्याने या भागात भाजपची स्थिती अधिक मजबूत झाली आहे. पुण्यात यंदा भाजप आणि शरद पवार गट यांच्यात अनेक प्रभागांत थेट लढत आहे. प्रमोद शिंदे यांच्या पक्षप्रवेशामुळे कोथरूडमधील युवकांची मोठी फळी आता भाजपच्या प्रचारात सक्रिय होणार असून, याचा थेट फायदा भाजपच्या अधिकृत उमेदवारांना होण्याची शक्यता वर्तवण्यात येत आहे.