हातमाग विणकरांच्या पेन्शनसाठी शासनस्तरावर प्रयत्न करणार – वस्त्रोद्योग मंत्री चंद्रकांत पाटील
मालेगाव : वैविध्यपूर्ण गुणांनी सर्वसंपन्न असलेली पैठणी म्हणजे महाराष्ट्राचं वैभव! राज्याच्या या वैभवशाली परंपरेचे जतन आणि संवर्धन करण्यात विणकरांचे मोठे योगदान राहिले आहे. त्यामुळे महाराष्ट्रात वस्त्रोद्योग वाढीस चालना देण्यासाठी व वस्त्र उद्योगाला आवश्यक त्या उपाययोजनांचा हातभार लावण्यासाठी वस्त्रोद्योग धोरण २०२३-२४ अंतर्गत विणकरांना उत्सव भत्ता देण्यात येणार आहे. वस्त्रोद्योग मंत्री चंद्रकांत पाटील यांनी शनिवारी आपल्या नाशिक प्रवासादरम्यान येवला येथील विणकर बांधवांना या भत्याचे वाटप केले. येवला येथील महात्मा फुले नाट्यगृहामध्ये एकात्मिक व शाश्वत वस्त्रोद्योग धोरण २०२३-२८ अंतर्गत हातमाग विणकरांना उत्सव भत्ता धनादेश वाटप सोहळा चंद्रकांत पाटील व अन्न, नागरी पुरवठा व ग्राहक संरक्षण मंत्री छगन भुजबळ यांच्या उपस्थितीत पार पडला.
पाटील म्हणाले की, देशात येवल्याच्या पैठणीचा नावलौकिक आहे. याचबरोबर शाल, पैठणी, घोंगडी या पारंपारिक व्यवसायात विणकर हे वर्षभर काम करतात. परंतु, त्यांना पाहिजे तसा मोबादला मिळत नाही. त्यामुळे उत्सव योजनेच्या माध्यमातून विणकरांचा व्यवसाय टिकण्यास मदत होईल व कुटूंबाला उदरनिर्वाह होण्यास मदत होईल. त्याअनुषंगाने विणकरांना वर्षातून किमान दोन ते तीन वेळेस लाभ देण्याबाबत शासनस्तरावर प्रयत्न सुरु आहेत.