लोकमान्य टिळक यांचे पणतू, केसरीचे विश्वस्त डॉ. दीपक टिळक यांचे निधन… त्यांच्या रूपाने एक सुसंस्कृत आणि बहुश्रुत व्यक्तिमत्व हरपले – उच्च व तंत्र शिक्षण मंत्री चंद्रकांत पाटील

पुणे : लोकमान्य टिळक यांचे पणतू, ‘केसरी’ चे विश्वस्त – संपादक तथा टिळक महाराष्ट्र विद्यापीठाचे कुलगुरू डॅा. दीपक जयंतराव टिळक यांचे आज पहाटे दुःखद निधन झाले. ते 74 वर्षांचे होते. दिपक टिळक हे टिळक महाराष्ट्र विद्यापीठाचे कुलपती देखील होते. त्याचबरोबर अनेक संस्थांचे ते विश्वस्त होते. पहाटेच्या सुमारास पुण्यातील राहत्या घरी त्यांनी अखेरचा श्वास घेतला. त्यांच्या पश्चात काँग्रेस नेते असलेले सुपुत्र रोहित टिळक, कन्या, नातवंडे असा परिवार आहे. त्यांच्या रूपाने एक सुसंस्कृत आणि बहुश्रुत व्यक्तिमत्व हरपले, अशी प्रतिक्रिया उच्च व तंत्र शिक्षण मंत्री चंद्रकांत पाटील यांनी दिली.
चंद्रकांत पाटील यांनी डॅा. दीपक जयंतराव टिळक यांच्या निधनाचे वृत्त कळताच शोक व्यक्त केला . त्यांच्या रूपाने एक सुसंस्कृत आणि बहुश्रुत व्यक्तिमत्व हरपले. त्यांना माझी भावपूर्ण श्रद्धांजली. टिळक परिवारावर ओढवलेल्या या दुःखात मी सहभागी आहे. ईश्वर त्यांच्या आत्म्यास शांती देवो, ही प्रार्थना, अशा भावना पाटील यांनी व्यक्त केल्या.
डॉ. दीपक टिळक हे लोकमान्य बाळ गंगाधर टिळक यांचे पणतू होते. ‘केसरी’चे विश्वस्त संपादकपद देखील त्यांनी भूषवलं आहे. डॉ. दीपक टिळक हे काही काळ टिळक महाराष्ट्र विद्यापीठाचे कुलपती देखील राहिले होते. शिक्षण, पत्रकारिता, सामाजिक कार्य या क्षेत्रांत उल्लेखनीय योगदान दिले. जपानी भाषेच्या प्रसारासाठी डॉ. दीपक टिळक यांनी केलेल्या कार्याची जपान सरकारनेही दखल घेतली होती. तसेच, लोकमान्य टिळक राष्ट्रीय पुरस्काराचे समितीचे अध्यक्ष म्हणूनही त्यांनी महत्त्वाची भूमिका बजावली. टिळक महाराष्ट्र विद्यापीठाच्या माध्यमातून त्यांनी शैक्षणिक क्षेत्रात भरीव असे कार्य केले आहे.