उच्च व तंत्र शिक्षण मंत्री चंद्रकांत पाटील यांनी उच्च शिक्षण विभागासाठी उभारण्यात येत असलेल्या नवीन इमारत प्रकल्पाची पाहणी करून घेतला सविस्तर आढावा
मुंबई : चेंबूर येथे उच्च व तंत्र शिक्षण मंत्री चंद्रकांत पाटील यांनी आज उच्च शिक्षण विभागासाठी उभारण्यात येत असलेल्या नवीन इमारत प्रकल्पाची पाहणी करून सविस्तर आढावा घेतला. बैठकीदरम्यान प्रकल्पाची प्रगती, बांधकामाची गुणवत्ता, रचना आणि विभागीय कार्यक्षमतेच्या दृष्टीने विकसित होणाऱ्या पायाभूत सुविधांचा आढावा घेण्यात आला. तसेच पुढील कामकाजाची रूपरेषा निश्चित करण्यात आली.
शैक्षणिक संकुल कार्यान्वित झाल्यानंतर उच्च शिक्षण विभागाच्या सर्व शासकीय सेवांना अधिक गती मिळेल तसेच विद्यार्थ्यांना आणि नागरिकांना एकाच ठिकाणी सेवा व माहितीची उपलब्धता होईल. त्यामुळे हा प्रकल्प विभागीय कामकाजाच्या दृष्टीने अत्यंत महत्त्वाचा ठरणार असल्याची माहिती पाटील यांनी दिली.
या बांधकामाला अधिक गती देऊन पुढील शैक्षणिक वर्षापूर्वी सर्व कार्यालये एकाच ठिकाणी सुरू करण्याचे निर्देश पाटील यांनी दिले. तसेच, चेंबूर येथील बांधकामाच्या समन्वयासाठी प्राचार्य दर्जाच्या अधिकाऱ्यांची स्वतंत्र समन्वयक म्हणून नेमणूक करण्याचे आदेशही देण्यात आले.
यावेळी उच्च शिक्षण संचालक डॉ. शैलेंद्र देवळाणकर, तंत्रशिक्षण विभागाचे संचालक डॉ. विनोद मोहितकर, उच्च शिक्षण विभागाचे उपसचिव अशोक मांडे तसेच संबंधित अधिकारी उपस्थित होते.