मुंबई, ०३ डिसेंबर : विधानभवन येथे विधानसभा आणि विधानपरिषद विधिमंडळ कामकाज सल्लागार समितीची बैठक आज संपन्न झाली. या बैठकीत सोमवार दिनांक 08 डिसेंबर 2025 पासून नागपूर येथे सुरु होणाऱ्या महाराष्ट्र विधिमंडळाच्या अधिवेशनाचे कामकाज रविवार दिनांक 14 डिसेंबर 2025 पर्यंत निश्चित करण्यात आले. शनिवार दि.१३ डिसेंबर आणि रविवार दि.१४ डिसेंबर या सुट्टीच्या दिवशी देखील सभागृहाचे कामकाज सुरु राहील.
या बैठकीस विधानपरिषद सभापती प्रा. राम शिंदेजी, विधानसभा अध्यक्ष राहुलजी नार्वेकर, मुख्यमंत्री देवेंद्रजी फडणवीस, उपमुख्यमंत्री एकनाथजी शिंदे, उपमुख्यमंत्री अजितदादा पवार, विधानपरिषद उपसभापती डॉ. नीलमताई गोऱ्हे, विधानसभा उपाध्यक्ष अण्णा बनसोडेजी, तसेच महसूल मंत्री चंद्रशेखरजी बावनकुळे, जलसंपदा मंत्री राधाकृष्णजी विखे पाटील, संस्कृतीकार्य मंत्री आशिषजी शेलार, उच्च व तंत्र शिक्षण मंत्री चंद्रकांत पाटील, तसेच आमदार व वरिष्ठ अधिकारी उपस्थित होते.
भारताच्या संविधानाची गौरवशाली अमृत महोत्सवी वाटचाल या ऐतिहासिक पर्वानिमित्त २६ मार्च २०२५ रोजी विधानसभेत चर्चा झाली होती. या वेळी झालेल्या चर्चेला उत्तर देताना देवेंद्र फडणवीस यांनी केलेल्या भाषणाचे पुस्तक स्वरूपातील संकलन महाराष्ट्र विधिमंडळ वि.स. पांगे संसदीय प्रशिक्षण केंद्राच्या पुढाकारातून करण्यात आले आहे. या पुस्तकाचे प्रकाशन मंगळवार, ९ डिसेंबर २०२५ रोजी राज्यपाल आचार्य देवव्रत यांच्या हस्ते करण्यात येणार आहे, असे विधानसभा अध्यक्ष ॲड. राहुल नार्वेकर यांनी यावेळी सांगितले.