महानगरपालिका क्षेत्र हे आपले कुटुंब मानून जनतेशी निष्ठेने आणि पक्षाशी प्रामाणिक राहून कार्य करा; सांगलीत मंत्री चंद्रकांत पाटील यांचे नवनिर्वाचित लोकप्रतिनिधींना आवाहन
सांगली : सांगली महानगरपालिका निवडणुकीत भारतीय जनता पार्टीच्या वतीने विजयी झालेल्या नवनिर्वाचित नगरसेवकांचा गौरव सोहळा रविवारी उत्साहात पार पडला. राज्याचे मंत्री चंद्रकांत पाटील यांनी सर्व विजयी नगरसेवकांचा सन्मान करून त्यांना पुढील वाटचालीसाठी शुभेच्छा दिल्या. विशेष म्हणजे, या निवडणुकीत निकराची झुंज देणाऱ्या पराभूत पण लढवय्या उमेदवारांचाही यावेळी विशेष सन्मान करून त्यांना प्रोत्साहन देण्यात आले.
नगरसेवकांना मार्गदर्शन करताना चंद्रकांत पाटील म्हणाले की, “निवडून आल्यानंतर आता नागरी समस्या सोडवण्याला सर्वोच्च प्राधान्य द्या. संपूर्ण महानगरपालिका क्षेत्र हे आपले कुटुंब आहे असे मानून जनतेशी निष्ठेने आणि पक्षाशी प्रामाणिक राहून शहराच्या सर्वांगीण विकासासाठी काम करा.” विकासाचे स्पष्ट व्हिजन समोर ठेवून जनसेवेचा संकल्प अधिक दृढ करण्याचे आवाहनही त्यांनी यावेळी केले.
या कार्यक्रमास माजी मंत्री आमदार डॉ. सुरेश खाडे, आमदार सुधीरदादा गाडगीळ, नीताताई केळकर, दीपकबाबा शिंदे–म्हैशाळकर, जयश्री वहिनी पाटील, संगीता शेंडगे, मकरंद देशपांडे, शेखर इनामदार यांच्यासह भाजपाचे सर्व पदाधिकारी मोठ्या संख्येने उपस्थित होते.