राज्य विधिमंडळाचे अर्थसंकल्पीय अधिवेशन ३ मार्चपासून मुंबईत; १० मार्च रोजी अर्थसंकल्प

मुंबई : राज्य विधिमंडळाचे अर्थसंकल्पीय अधिवेशन मुंबई येथे सोमवार दि. ३ मार्च ते बुधवार दि. २६ मार्च २०२५ या कालावधीत होणार आहे. राज्याचा अर्थसंकल्प १० मार्च रोजी विधिमंडळाच्या दोन्ही सभागृहात मांडण्यात येणार आहे. या अनुषंगाने आज विधानभवन मुंबई येथे विधिमंडळ कामकाज सल्लागार समितीची बैठक मुख्यमंत्री देवेंद्रजी फडणवीस, विधानसभा अध्यक्ष अ‍ॅड. राहुलजी नार्वेकर, विधान परिषदेचे सभापती प्रा. राम शिंदे ,उपमुख्यमंत्री एकनाथजी शिंदे, उपमुख्यमंत्री अजितदादा पवार तसेच संसदीय कार्य मंत्री चंद्रकांत पाटील यांच्या प्रमुख उपस्थितीत पार पडली.

यावेळी सहकारी मंत्री राधाकृष्ण विखे पाटील, गिरीश महाजन , छगन भुजबळ , आ.प्रसाद लाड, आ.प्रवीण दरेकर, आ.अनिल परब, विधानमंडळ सचिवालयाचे सचिव जितेंद्र भोळे व इतर संबंधित अधिकारी उपस्थित होते.विधानपरिषदेच्या उपसभापती डॉ. नीलम गोऱ्हे या दूरदृष्य प्रणालीद्वारे सहभागी झाल्या होत्या.

अर्थसंकल्पीय अधिवेशन कालावधीत शनिवार दि. ८ मार्च २०२५ रोजी सार्वजनिक सुटीच्या दिवशी विधिमंडळाचे कामकाज सुरू राहील, तर दि. १३ मार्च २०२५ रोजी होळी निमित्त कामकाजास सुटी देण्याचे या बैठकीत ठरविण्यात आले.