महाराष्ट्रातील ५ लाख विद्यार्थिनींसाठी ‘कमवा व शिका’ या योजनेअंतर्गत महिन्याला २,००० रुपये मानधन आणि उच्च शिक्षण पूर्णतः मोफत करणार – उच्च व तंत्र शिक्षण मंत्री चंद्रकांत पाटील

नागपूर : राष्ट्रसंत तुकडोजी महाराज नागपूर विद्यापीठात आज उच्च व तंत्र शिक्षण मंत्री चंद्रकांत पाटील यांच्या प्रमुख उपस्थितीत आढावा बैठक संपन्न झाली. या बैठकीत विद्यापीठाच्या सर्वांगीण प्रगतीसंदर्भात सविस्तर चर्चा काण्यात आली.

बैठकीत एनआयआरएफ रँकिंग, नॅक मानांकन, नवीन राष्ट्रीय शैक्षणिक धोरण (NEP 2020) यांची प्रभावी अंमलबजावणी, संलग्न महाविद्यालयांच्या नॅक रँकिंगमध्ये वाढ, एईडीपी अभ्यासक्रमात विद्यार्थी सहभाग वाढविणे, स्वायत्त महाविद्यालयांमध्ये नवे अभ्यासक्रम सुरू करणे, शिक्षक व शिक्षकेतर कर्मचाऱ्यांची पदभरती, तसेच विद्यापीठातील संशोधन प्रकल्पांना निधी उपलब्ध करून देणे या महत्त्वाच्या मुद्द्यांवर सकारात्मक चर्चा करण्यात आली.

यावेळी महाराष्ट्रातील ५ लाख विद्यार्थिनींसाठी ‘कमवा व शिका’ या योजनेअंतर्गत महिन्याला २,००० रुपये मानधन देण्याचा व उच्च शिक्षण पूर्णतः मोफत करण्याचा महत्त्वपूर्ण निर्णय घेण्यात आला, असल्याची माहिती पाटील यांनी दिली.

बैठकीस माननीय कुलगुरू डॉ. माधवी खोडे चवरे (भाप्रसे) यांच्यासह उच्च शिक्षण संचालक डॉ. शैलेंद्र देवळाणकर, कला महासंचालनालयाचे संचालक डॉ. किशोर इंगळे, कुलसचिव डॉ. राजू हिवसे, शिक्षण उपसंचालक डॉ. संतोष चव्हाण, डॉ. मनोज डायगव्हाणे, वित्त व लेखा अधिकारी हरीश पालीवाल, विविध विद्याशाखांचे अधिष्ठाते आणि विभाग प्रमुख मोठ्या संख्येने उपस्थित होते.