चिथावणीखोर वक्तव्याप्रकरणी कालिचरण महाराज, मिलिंद एकबोटेंसह 6 जणांविरुद्ध गुन्हा दाखल

पुणे: रायपूर येथील धर्मसंसदेत महात्मा गांधी यांच्याबद्दल वादग्रस्त वक्तव्य करणारे कालीचरण महाराज ऊर्फ अभिजित सराग पुण्यातील एका प्रकरणातही अडकले आहेत. पुण्यात १९ डिसेंबर रोजी झालेल्या कार्यक्रमात चिथावणीखोर भाषण केल्याबद्दल त्यांच्यासह समस्त हिंदू आघाडीचे मिलिंद एकबोटे  यांच्यावर गुन्हा दाखल करण्यात आला आहे.

पुण्यातील नातूबाग मैदानात १९ डिसेंबर रोजी शिवप्रताप दिन म्हणजेच, अफजलखान वधाचा आनंदोत्सव साजरा करण्यात आला. याच कार्यक्रमात मिलिंद एकबोटे आणि कालीचरण यांनी मुस्लिम व ख्रिश्चन धर्मीयांबद्दल आक्षेपार्ह वक्तव्य केले होते. दोन समाजांमध्ये तेढ निर्माण होईल असं वक्तव्य केल्यामुळं त्यांच्यावर खडक पोलीस ठाण्यात गुन्हा दाखल करण्यात आला आहे. कालीचरण महाराजांनी या कार्यक्रमात गांधीजींबद्दलही आक्षेपार्ह विधानं केली होती. कालीचरण व एकबोटे यांच्या बरोबरच मोहन शेटे, दीपक बाबुलाल नागपूरे, कॅप्टन दिगेंद्रकुमार (रा. राजस्थान) आणि नंदकिशोर एकबोटे यांच्यावरही गुन्हा दाखल करण्यात आला आहे.

या सर्वांनी धार्मिक श्रद्धाचा अपमान केला आणि कार्यक्रमाला उपस्थित असलेल्या लोकांना भडकवण्याचा प्रयत्न केला, असं तक्रारीत म्हटलं आहे. तक्रारदारांनी पोलिसांकडे संबंधितांच्या भाषणाची क्लिपही दिली होती. त्या व्हिडिओ क्लिपची पडताळणी केल्यानंतर गुन्हा दाखल करण्यात आला आहे. दरम्यान, छत्तीसगडमधील रायपूर येथे झालेल्या धर्मसंसदेत केलेल्या वादग्रस्त वक्तव्याप्रकरणी कालीचरण महाराजांवर अकोला व रायपूर येथे देखील गुन्हे दाखल करण्यात आले आहेत.