गुजरातमधील अहमदाबाद इथे एअर इंडियाच्या विमानाचा भीषण अपघात… 242 प्रवाशांना घेऊन जाणारं विमान टेक ऑफ केल्यानंतर अवघ्या 5 मिनिटातच कोसळले
गुजरात : गुजरातच्या अहमदाबादमध्ये एक मोठी विमान दुर्घटना घडली आहे. २४२ प्रवाशांना घेऊन जाणारं प्रवासी विमान अहमदाबादच्या मेघानीनगर परिसरात कोसळलं असल्याची माहिती समोर आली आहे. एअर इंडिया या विमान वाहतूक कंपनीचे बोईंग 787 हे विमान अहमदाबादहून लंडनला जात होते. एअर इंडियाच्या या विमानाने अहमदाबादहून लंडनसाठी उड्डाण केले होते. मात्र, दुपारी 1.31 वाजता केलेल्या उड्डाणानंतर अवघ्या काही मिनिटांतच विमान खाली कोसळलं. या दुर्घटनेनंतर काही वेळातच 3 अग्निशमन गाड्या घटनास्थळी दाखल झाल्या होत्या. सध्या, एनडीआरएफचे पथक आणि प्रशासनाकडून युद्धपातळीवर बचावकार्य सुरू करण्यात आलं आहे. पंतप्रधान नरेंद्र मोदी आणि केंद्रीय मंत्री अमित शाह घटनास्थळी लवकरच दाखल होणार आहेत. विमान दुर्घटनेनंतर गृहमंत्री अमित शाह यांनी गुजरातच्या मुख्यमंत्र्यांना फोन करुन माहिती घेतली, तसेच सर्वोतोपरी मदत करण्याचे त्यांनी आश्वासनही दिले.
अहमदाबाद येथे एअर इंडियाच्या विमानाचा भीषण अपघात झाला असून ७०० फुटांवरुन मेघानीनगर ह्या नागरी वस्तीत हे विमान कोसळलं. एअर इंडियाचं हे विमान एका इमारतीवर कोसळलं असून ती इमारत रुग्णालयाची असल्याची माहिती समोर आली आहे. अहमदाबादहून लंडनला म्हणजेच दूर मार्गावर जाणार असल्याने या विमानात इंधन देखील मोठ्या प्रमाणात भरण्यात आलं होतं, त्यामुळे अपघातानंतर दुर्घटनास्थळी मोठा स्फोट झाला. मिळालेल्या माहितीनुसार विमान ज्या रुग्णालयावर कोसळलं त्या रुग्णालयातील १५ डॉक्टर जखमी झाले असून काही रुग्णांना देखील गंभीर दुखापत झाल्याची माहिती आहे. विमानातून 10 क्रू मेंबरांसह तब्बल २४२ प्रवासी प्रवास करत असल्याची प्राथमिक माहिती समोर आली आहे.
एअर इंडियाच्या या दुर्घटनाग्रस्त विमानात एकूण 242 प्रवासी प्रवास करत होते, त्यामध्ये 169 भारतीय प्रवासी, 53 ब्रिटीश नागरिक, पोर्तुगालचे 7 आणि कॅनडाचा एक नागरिक प्रवास करत असल्याची माहिती आहे. मिळालेल्या माहितीनुसार या विमानात गुजरातचे माजी मुख्यमंत्री विजय रुपाणी हेदेखील प्रवास करत होते. या विमानाच्या पायलटला अपघात होण्याची चाहूल लागली होती, असे सांगितले जात आहे . त्याने एक आपत्कालीन संदेशही पाठवला होता, अशी माहिती डिजीसीएने दिली आहे. यात जखमी झालेल्यांना आणि होरपळलेल्यांना तातडीने उपचारासाठी रुग्णालयात आणलं जात आहे. मोठी जीवितहानी या विमान दुर्घटनेत झाली असल्याची भीती व्यक्त केली जात आहे.