विद्यार्थिनींच्या सुरक्षेसाठी वसतीगृहाच्या सुरक्षा नियमावलीचे काटेकोरपणे पालन करणे आवश्यक – उच्च व तंत्र शिक्षण मंत्री चंद्रकांत पाटील

मुंबई : उच्च तंत्र शिक्षणविभागांतर्गत मुलींच्या वसतिगृहातील सुरक्षेसंदर्भात उच्च व तंत्र शिक्षण मंत्री चंद्रकांत पाटील यांच्या अध्यक्षतेखाली बैठक झाली. विद्यार्थिनींच्या सुरक्षेसाठी वसतीगृहाच्या सुरक्षा नियमावलीचे काटेकोरपणे पालन करून आवश्यक सुरक्षा व्यवस्था 24 तास उपलब्ध राहील, याची दक्षता सबंधितांनी घ्यावी, अशा सूचना चंद्रकांत पाटील यांनी दिल्या.

यावेळी पाटील म्हणाले कि, वसतिगृहातील सुरक्षा महत्वाची असून पालक म्हणून संबंधित अधिकारी यांनी अधिक जबाबदारीने लक्ष द्यावे,वसतिगृहातील सुरक्षेची पाहणी आणि आढावा सातत्याने घेण्यात यावा. तसेच जिल्ह्यातील संबंधित अधिकारी यांच्यावर वसतिगृहाच्या पालकत्वाची जबाबदारी देता येईल का याचा विचार करावा.

वसतीगृहाच्या सुरक्षेसाठी कडक उपाययोजना करणे आणि सुरक्षेसाठी विशेष काळजी घेणे आवश्यक आहे. सुरक्षा पुरविण्यात दिरंगाई केली तर संबंधितांवर कठोर कारवाई करण्यात येईल, असेही मंत्री पाटील यांनी यावेळी सांगितले.

बैठकीला उच्च व तंत्र शिक्षण विभागाचे प्रधान सचिव विकासचंद्र रस्तोगी, तंत्रशिक्षण विभागाचे संचालक डॉ. विनोद मोहितकर, सहसंचालक प्रकाश बच्छाव संबंधित अधिकारी उपस्थित होते.