राज्यातील जिल्ह्यांचे पालकमंत्री जाहीर, उच्च व तंत्र शिक्षण मंत्री चंद्रकांत पाटील यांच्याकडे सांगली जिल्ह्याच्या पालकमंत्री पदाची जबाबदारी

 

मुंबई : महाराष्ट्र राज्याचे मंत्री आणि राज्यमंत्री यांची जिल्हा पालकमंत्री तसेच सह-पालकमंत्री म्हणून सामान्य प्रशासन विभागाने नियुक्ती केली आहे. यानुसार मुख्यमंत्री देवेंद्र फडणवीस यांच्याकडे गडचिरोली जिल्ह्याचे पालकमंत्रीपद असणार आहे तर ॲड. आशिष जयस्वाल यांच्याकडे गडचिरोलीचे सहपालकमंत्रीपद सोपविण्यात आले आहे. तसेच उपमुख्यमंत्री एकनाथ शिंदे यांच्याकडे मुंबई शहर आणि ठाणे या दोन जिल्ह्यांचे पालकमंत्रीपद तर उपमुख्यमंत्री अजित पवार यांच्याकडे पुणे आणि बीड या दोन जिल्ह्यांचे पालकमंत्रीपद देण्यात आले आहे. तसेच उच्च व तंत्र शिक्षण मंत्री चंद्रकांत पाटील यांच्याकडे सांगली जिल्ह्याचे पालकमंत्री पद देण्यात आले आहे.

पालकमंत्री पदाची जबादारी मिळाल्यानंतर चंद्रकांत पाटील यांनी आपले मत व्यक्त करताना म्हटले कि, महाराष्ट्रातील सांगली जिल्ह्याचा पालकमंत्री म्हणून जबाबदारी मिळणं हे माझं भाग्य आहे. सांगलीसारख्या सुसंस्कृत आणि कलासंपन्न जिल्ह्याच्या पालकत्वाची जबाबदारी मला दिल्याबद्दल पंतप्रधान नरेंद्र मोदीजी, गृहमंत्री अमित शाह , भाजपाचे राष्ट्रीय अध्यक्ष जे. पी नड्डा, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजितदादा पवार यांना मनःपूर्वक धन्यवाद.

तसेच पाटील पुढे म्हणाले कि, सर्वांच्या विश्वासाला पात्र ठरून या जिल्ह्याची धुरा सांभाळताना सांगलीचा विकास करेन, असा विश्वास देतो. राज्यातील विविध जिल्ह्यांच्या पालकमंत्रीपदी नियुक्ती झालेल्या माझ्या सहकाऱ्यांचे मनःपूर्वक अभिनंदन आणि नव्या जबाबदारीसाठी शुभेच्छा पाटील यांनी दिल्या.

उर्वरित जिल्ह्यांच्या पालकमंत्रीपदाची व सहपालकमंत्रीपदाची जबाबदारी पुढीलप्रमाणे :

नागपूर व अमरावती : चंद्रशेखर बावनकुळे,

अहिल्यानगर : राधाकृष्ण विखे-पाटील,

वाशीम : हसन मुश्रीफ,

नाशिक : गिरीश महाजन,

पालघर : गणेश नाईक,

जळगाव : गुलाबराव पाटील,

यवतमाळ : संजय राठोड,

मुंबई उपनगर : ॲड.आशिष शेलार तर सहपालकमंत्री मंगलप्रभात लोढा,

रत्नागिरी : उदय सामंत,

धुळे : जयकुमार रावल,

जालना : श्रीमती पंकजा मुंडे,

नांदेड : अतुल सावे,

चंद्रपूर : डॉ.अशोक उईके,

सातारा : शंभूराज देसाई,

रायगड : कु.आदिती तटकरे,

लातूर : शिवेंद्रसिंह भोसले,

नंदुरबार : ॲड.माणिकराव कोकाटे,

सोलापूर : जयकुमार गोरे,

हिंगोली : नरहरी झिरवाळ,

भंडारा : संजय सावकारे,

छत्रपती संभाजीनगर : संजय शिरसाट,

धाराशिव : प्रताप सरनाईक,

बुलढाणा : मकरंद जाधव (पाटील),

सिंधुदुर्ग : नितेश राणे,

अकोला : आकाश फुंडकर,

गोंदिया : बाबासाहेब पाटील,

कोल्हापूर : प्रकाश आबिटकर तर सहपालकमंत्री श्रीमती माधुरी मिसाळ,

वर्धा : डॉ.पंकज भोयर आणि

परभणी : श्रीमती मेघना बोर्डीकर