बचत गटांच्या वस्तू विक्रीसाठी जिल्हास्तरावर मॉल उभा करण्यासाठी सहकार्य करणार -पालकमंत्री चंद्रकांत पाटील

उमेदच्या माध्यमातून बचत गटातील महिलांना विविध उद्योग व्यवसायाचे प्रशिक्षण देण्यात येणार असल्याचे नमूद करून त्या बचत गटातील महिलांनी उत्पादित केलेल्या वस्तूना चांगली बाजारपेठ उपलब्ध व्हावी यासाठी जिल्हास्तरावर मॉल निर्माण करण्यास सहकार्य करणार असल्याचे याप्रसंगी पाटील यांनी आश्वस्त केले. दरम्यान, सोलापूर जिल्ह्यातील नागरिकांनी उमेद च्या माध्यमातून दिनांक 19 ते 21 जानेवारी दरम्यान आयोजित या महोत्सव, प्रदर्शन व विक्री केंद्रास बहुसंख्येने भेट द्यावी असे आवाहनही याप्रसंगी केले.

पाटील पुढे म्हणाले की, बचत गटातील महिलांनी तयार केलेल्या वस्तूंची दीर्घकाळ साठवणूक होणे ही अत्यंत आवश्यक आहे. त्यामुळे अशा वस्तूंची साठवणूक करण्यासाठी कोल्ड स्टोरेज ची आवश्यकता आहे. तरी असे कोल्ड स्टोरेज निर्माण करण्यासाठी जिल्हा नियोजन समिती मधून एक कोटी सहा लाखाचा निधी उपलब्ध केला जात असल्याचे त्यांनी सांगितले.

आजच्या महिलांचा उच्चशिक्षित होण्याकडे कल अधिक वाढत आहे. महिलांनी शिक्षण घेऊन हाऊस वाइफ ही ओळख न ठेवता कुटुंबाला आर्थिक सहकार्य करण्यासाठी बचत गटाच्या माध्यमातून उद्योग व्यवसाय सुरू करावे त्यासाठी आवश्यक असलेले प्रशिक्षण ही घ्यावे असे आवाहन पालकमंत्री पाटील यांनी करून अमरावती प्रमाणे सोलापूर जिल्ह्यात ही महिला बचत गटाच्या उत्पादित वस्तूंसाठी बाजारपेठ निर्माण करण्यासाठी प्रयत्न करावेत. त्यासाठी आवश्यक ते सहकार्य करण्यास तयार असल्याचे त्यांनी सांगितले. उमेद च्या माध्यमातून जिल्ह्यात महिला बचत गटासाठी करण्यात येत असलेल्या कामाबद्दल पालकमंत्री चंद्रकांत पाटील यांनी समाधान व्यक्त केले.

जिल्ह्यातील नागरिकांनी उमेद च्या माध्यमातून दिनांक 19 ते 21 जानेवारी दरम्यान रंगभवन जवळील वोरोनाका प्रशाला च्या प्रांगणात आयोजित मिनी सरस व जिल्हास्तरीय रुक्मिणी महोत्सव प्रदर्शन व विक्रीस भेट देण्याचे आवाहन पालकमंत्री चंद्रकांत पाटील यांनी केले.

यावेळी जिल्हा परिषदेच्या मुख्य कार्यकारी अधिकारी मनिषा आव्हाळे, जिल्हा ग्रामीण विकास यंत्रणेचे प्रकल्प संचालक डॉ.सुधीर ठोंबरे, उपमुख्य कार्यकारी अधिकारी (पाणी व स्वच्छता ) अमोल जाधव , जिल्हा आरोग्य अधिकारी डॉ.संतोष नवले, गट विकास अधिकारी आनंद मिरगणे, जिल्हा अभियान व्यवस्थापक सचिन चवरे आदी उपस्थित होते.