राज्यपालांच्या खांद्यावर बंदूक ठेवून भाजपचं राजकारण – नाना पटोले
पुणे: राज्यपाल भगतसिंग कोश्यारी यांच्या खांद्यावर बंदूक ठेवून भाजपा महाराष्ट्रात राजकारण करत आहे. त्यांचे हे कृत्य लोकशाहीसाठी घातक असल्याची टीका काँग्रेस प्रदेशाध्यक्ष नाना पटोले यांनी केली आहे. फेब्रुवारीच्या पहिल्या आठवड्यात अधिवेशन सुरू होईल. त्यावेळी विधानसभा अध्यक्षांची निवड होणार असल्याचेही त्यांनी सांगितले. यावेळी ते पुण्याच्या बोपोडीत प्रसार माध्यमांशी बोलत होते.
“पहाटेचे सरकार पडले तेव्हापासून मी पुन्हा येईन… मी पुन्हा येईन… ही भूमिका घेऊन भाजपा सत्तेचे दिवसा स्वप्न पाहात आहेत. राज्यात अस्थिरता कशी निर्माण केली जाईल आणि राज्याचा विकास होणार नाही. कुठल्याही परिस्थितीत आम्हाला सत्ता पाहिजे, अशी भूमिका भाजपाची आहे. राज्यपालांच्या खांद्यावर बंदूक ठेवून जे राजकारण केल जात आहे. ते कृत्य लोकशाहीसाठी घातक आहे.” अशी टीका नाना पटोले यांनी केली आहे.
राज्याच्या कृषी कायद्यासंदर्भात बोलताना पटोले म्हणाले, “शेतकऱ्यांच्या हिताचा विचार करता राज्याचा कृषी कायदा घाईघाईने बनवला जाऊ नये. राज्यातील शेतकऱ्यांच्या हिताचा विचार करुन फुलप्रुफ कायदा व्हावा ही काँग्रेस पक्ष व महाविकास आघाडी सरकारची भूमिका आहे. तीच भूमिका मुख्यमंत्री उद्धव ठाकरे यांचीही आहे. केंद्र सरकारने आणलेल्या तीन काळ्या कृषी कायद्यांना आमचा विरोध आहे. केंद्राचे कृषी कायदे राज्यात लागू होणार नाहीत. राज्य सरकार आपला कायदा बनवेल. हा कायदा शेतकऱ्यांचे हित डोळ्यासमोर ठेवूनच बनवला जाईल त्यासाठीचा मसुदा जनतेसमोर ठेवून शेतकऱ्यांची व जनतेची मतं मागवली जातील आणि त्यातून कायदा बनवला जाईल.”