मंत्री चंद्रकांत पाटील यांच्या हस्ते पुण्याच्या मानाच्या पाचही गणपतींची आरती; सपत्नीक घेतले बाप्पाचे आशीर्वाद
पुणे : पुण्यनगरीच्या ऐतिहासिक आणि पारंपरिक गणेशोत्सवाच्या अत्यंत भारावून टाकणाऱ्या वातावरणात राज्याचे मंत्री चंद्रकांत पाटील यांनी आज पुण्यातील मानाच्या पाचही गणपतींचे सपत्नीक मनोभावे दर्शन घेतले. पुण्यनगरीच्या या अद्वितीय आणि भक्तीमय सोहळ्यात सहभागी होत त्यांनी सर्व मानाच्या मंडळांच्या श्रीगणरायाची विधिवत पूजा-आरती केली आणि विघ्नहर्त्याच्या चरणी नतमस्तक होऊन राज्याच्या सुख-समृद्धीसाठी प्रार्थना केली.
मंत्री चंद्रकांत पाटील यांनी आपल्या दर्शन दौऱ्याची सुरुवात पुण्याचे ग्रामदैवत असलेल्या मानाच्या पहिल्या श्री कसबा गणपतीपासून केली, जिथे त्यांनी बाप्पाची सपत्नीक पूजा-अर्चना करून आशीर्वाद घेतले. त्यानंतर त्यांनी मानाच्या दुसऱ्या श्री तांबडी जोगेश्वरी गणपतीचे दर्शन घेऊन पुण्यनगरीच्या भक्तीमय वातावरणात सर्वांना सुख, समाधान आणि यश लाभण्याची कामना केली. “तू सुखकर्ता, तू दुःखहर्ता, विघ्नविनाशक मोरया” अशा जयघोषात त्यांनी मानाच्या तिसऱ्या श्री गुरुजी तालीम गणरायाची सपत्नीक आरती केली. पुढे आपला हा भक्तीचा प्रवास सुरू ठेवत त्यांनी भव्य आणि आकर्षक रूप असलेल्या मानाच्या चौथ्या श्री तुळशीबाग गणपतीचे दर्शन घेतले आणि शेवटी लोकमान्य टिळकांच्या ऐतिहासिक विचारांचा वारसा लाभलेल्या मानाच्या पाचव्या श्री केसरीवाडा गणपतीचे मनोभावे दर्शन घेऊन आरती केली.
या दर्शन सोहळ्यानंतर भावना व्यक्त करताना मंत्री चंद्रकांत पाटील म्हणाले की, पुण्याच्या पारंपरिक गणेशोत्सवाचा भव्य उत्साह आणि भक्तीचा महापूर मनाला एक वेगळीच ऊर्जा देणारा आहे. विघ्नहर्त्या गणरायाच्या आशीर्वादाने प्रत्येक नागरिकाच्या आयुष्यात आनंद, शांती, उत्तम आरोग्य आणि मंगलमयता नांदो, हीच बाप्पाच्या चरणी मनःपूर्वक प्रार्थना आहे. या संपूर्ण दर्शन दौऱ्यादरम्यान सर्वच गणेश मंडळांच्या पदाधिकाऱ्यांनी व कार्यकर्त्यांनी मंत्री चंद्रकांत पाटील व त्यांच्या सुविद्य पत्नी यांचे अत्यंत उत्साहात स्वागत करून यथोचित सन्मान केला.