श्री सोमेश्वर साखर कारखाना निवडणूक: सुनेत्रा पवार यांच्या पॅनेलचा २१-० ने ऐतिहासिक विजय; मंत्री चंद्रकांत पाटील यांच्याकडून अभिनंदन
मुंबई, १४ ऑक्टोबर : श्री सोमेश्वर सहकारी साखर कारखान्याच्या पंचवार्षिक निवडणुकीत उपमुख्यमंत्री सुनेत्रावहिनी पवार यांच्या नेतृत्वाखालील ‘श्री सोमेश्वर विकासपुरुष अजितदादा पवार पॅनेल’ने सर्वच्या सर्व जागा जिंकत २१-० असा दणदणीत विजय मिळवला आहे. या ऐतिहासिक विजयानंतर महाराष्ट्राचे उच्च व तंत्र शिक्षण मंत्री चंद्रकांत पाटील यांनी सुनेत्रा पवार यांचे मनःपूर्वक अभिनंदन करत त्यांना पुढील वाटचालीसाठी शुभेच्छा दिल्या आहेत.
मंत्री चंद्रकांत पाटील यांच्याकडून कौतुक
या मोठ्या विजयाची दखल घेत राज्याचे उच्च व तंत्र शिक्षण मंत्री चंद्रकांत पाटील यांनी सुनेत्रा पवार यांची भेट घेत त्यांचे अभिनंदन केले. “सोमेश्वर कारखान्यातील हा विजय सुनेत्रावहिनींच्या सक्षम नेतृत्वाची पावती आहे,” अशा शब्दांत त्यांनी पवारांचे कौतुक केले व कारखान्याच्या पुढील प्रगतीसाठी शुभेच्छा दिल्या.
अजितदादांच्या पश्चात नेतृत्वाची मोठी कसोटी
अनेक वर्षांपासून सोमेश्वर कारखान्यावर उपमुख्यमंत्री अजित पवार यांचे एकहाती वर्चस्व होते. त्यांच्या पश्चात सुनेत्रा पवार यांच्या नेतृत्वाखाली लढली गेलेली ही पहिलीच मोठी निवडणूक होती. या निवडणुकीत सुनेत्रा पवार यांची प्रतिष्ठा पणाला लागली होती. त्यांनी सोमेश्वर परिसरातील गावागावात जाऊन झंझावाती प्रचार केला होता, ज्याला मतदारांनी भरभरून दाद दिली.
पुतण्या युगेंद्र पवार आणि बंडखोरांचे आव्हान मोडीत
या निवडणुकीत सुनेत्रा पवार यांच्यासमोर त्यांचे पुतण्या युगेंद्र पवार आणि कारखान्याचे माजी अध्यक्ष पुरुषोत्तम जगताप यांचे मोठे आव्हान होते. त्रिकोणी लढतीत अपक्षांनीही ताकद लावली होती. मात्र, सभासदांनी पुन्हा एकदा पवार परिवाराच्या अधिकृत पॅनेलवर विश्वास दाखवला. विरोधी पॅनेलला एकही जागा मिळवता आली नाही.